علم العفا وعفاك .. يا وافي الكيل
بساطه أبشّرك .. في خيـر و اعِفـا
نكفي بعضنا .. وانتكافا على الشيل
واللي تعب بالشيل والحطّ يكفـا !
من ذاق حرّ القايله يعشـق الليـل
ومن شبّ ضوّه ليلة البرد .. يدفـا
لاعاد ليلٍ ٍ نمت به في حرى سهيل
خايلت نوضٍ يخطف العين خطفا
امسيت من جيل ٍ ولاهوب ذا جيـل
واصبحت .. ولاّ ديرتي شبه منفا !
كنّا على فـال الشحـم و المعاميـل
ونفوسنا انقى من نقى العدّ و اصفا
وانا ولو راحت بقولـة : تساهيـل
صلف وصروف الوقت تحتاج صلفا
يا ترج جدّاني .. زحول الرجاجيـل
يحرم فلا لي عنك يا ترج .. مقفـا
إمّا لطمنا العيل .. ولاّ الطم العيـل
ما دام شبّ النار منـدوب الاطفـا
خل ابرهه الأشرم على ذمّة الفيـل
وانظر لشيٍ .. ما يوصفّه وصفـا
يا ذيـل والله ما تجي راس يا ذيل
علمٍ ماهو يغفـا ولاهـوب يخفـا
واللي حمـا بيتـه بـ طيـرٍ ابابيـل
ما جيتك ادوّر لمن راح و اقـفـا
ولا جيتك اطلب منك بن ٍ ولا هيـل
جيتك وجرح الظلم .. غاديه يشفـا
جيتك بكلمة .. كنّها صعقة الويـل
إن قلت تكفى .. لا تهاون بـ تكفى
تكفى .. تراها كلمةٍ تقطـم الحيـل
لا بالله إلا تنسـف الحيـل نسـفـا
تكفى .. ماهـي لمعقبيـن الفناجيـل
تكفى لصلف وعـادة القـرم صلفـا
تكفى .. ترى تكفى لها هدرة السيـل
في صدر حرٍّ .. ينتف الطيب نتفـا
تكفى .. ترى تكفى لها تسرج الخيـل
إن كان لك بالخيل سرج ٍ و عسفا
تكفـى .. تبيّـن كـلّ لاشٍ وحلحيـل
تسمع لها بالصـدر هبـدٍ و رجفـا
تكفى .. وتكفى ما تساق لمهابيـل
تكفى .. تخلّي القـرم لاشٍ وهطفـا
تكفى .. تجنّبني هل القـال والقيـل
مانيب من ينكف علـى كـل ملفـا
تكفى .. تراني من قروم ٍ مشاكيـل
حمّاية الساقـه .. بسيـفٍ وشلفـا
تكفى .. ترى تكفى تـهزّ الرجاجيل
لولا صروف الوقت ما قلت ( تكفى )
ليست هناك تعليقات:
إرسال تعليق