إيتوق قلبي للمظاهير ويـتوق
إلّخـوة رجالٍ كرامٍ .. نماره
ومن غالي أوقاتي على ظـرفي آسوق
في منهـج اللي معرفتهم .. تجاره
والكل منهم نشمي ويعطي احقوق
ليّن جناب وما يشك .. بوقاره
ماهو على ربعه احشوكي ومحموق
ولاهو على خبزه يقرب .. وجاره
ورخِا إلى ناض أشقر الريش لسبوق
يبغي الهدد للي تمايل .. طياره
إيبـوق في قصر المسافه معه بوق
بوقٍ عجل ينبيك قوّ .. الجساره
لحّـاق للي يحوق جو السما حوق
في عين منهو سابرٍ له شراره
فيـلا لحق يدوي على الخرب من فوق
وينزل شلو من قوّ زود إنحداره
ذا طبّ راعيّه وللشارده عوق
وهذي طراة الطير ياهل الصقاره
ولا يعيض الطير إلا هوى النوق
حمر النعم تسوى ختوم الأماره
أقولها وأنا من الضيـق مخنوق
أقولها وونس بكبدي مراره
لن المشاكي عيب حاله ومنطوق
تِنقص من الرجال هيبة وقاره
ولا أطيع السوق لو عاند السوق
أدري النتيجه لو بطاوع خساره
مابغي رفيقي للحزن مثلي ايذوق
ولا العدو يعطي عليها بشاره
من شي لا ضايع ولاهوب موثوق
ياكل بحالي مثل اكل الزقاره
ورجواي باللي خالقٍ كل مخلوق
يفرج لصدرٍ ضايقٍ به زراره
ليست هناك تعليقات:
إرسال تعليق