يا مل قلبن كنّه بجوف محماس .. يروح مثل البن لا صار محموس

يا مل قلب(ن) كنه بجوف محماس

يروح مثل البن لا صار محموس 

يفز قلبي كل ما دق هوجاس

فزة صقر لا فز من كف محروس

وأعوذ بالخلاق من كل وسواس

لا دق في قلبي من الضيق هاجوس

يطري عليه ذكر بالفعل نوماس

فيه الوفاء والطيب والصدق مغروس

ما يتبع النمات في كل مجلاس

ولا هو على بيوت المخاليق جاسوس

تشوف هبة ريح ودلال جلاس

وأهل المروه والوفاء حوله جلوس

فنجال دله داير(ن) يجلي عماس

ما بينهم خبيث طبع(ن) ودنفوس

ما بينهم رديان وأنذال وأنجاس

ولا بينهم نقال للهرج هدروس

هرجه قفا يهرج بها كل بلاس

واليا هرج بالكذب بيحوسها حوس

والعشره اللي ما توثق على ساس

سوات تمره داخل(ن) جوفها سوس

لا صار ما تشعل كما النار مقباس

صافي عسل لكن به سم مدسوس

ما هو صويب اللي سلم ضربة الراس

صويب من هو كل ضربه على الراس

قيست في بعض المخاليق بقياس

لكن خاب الظن في باري القوس

كل(ن) على قده يحصله قياس

يكفيه لا ياخذ من ألباس ملبوس

والعود ما ينفع ليا جاه الايباس

مغير عود الطيب لا صار مبسوس

وما كل من يقرب من البحر غطاس

ولا كل جرح تقطعه حدة الموس

وكليب ما همه بعد غدر جساس

تكتب يمينه وأصبح العلم مدروس

واللي قعد للذيب في جوف متراس

الذيب حطه بين نيبان وظروس

لقيت في الأصحاب من كل الأجناس

شكل العرب والطبع من طبع هندوس

بعض العرب هرجه كما عقد الالماس

والبعض الاخر هرجته لدغ ناموس

وبعض العرب يبغاك في كل مرواس

يبغاك لا منك غني راعي فلوس

وان طاح حظك بعد ما جاك الافلاس

تدوسك اصحاب الرخا بالقدم دوس

يا وجد روحي كل ما هب نسناس

وجد اليتيم اللي بعد فقر محبوس

راحت حياته كلها هم وأتعاس

ماله رفيق(ن) وأصبح الحال ميؤس

بنيت عجز الشطر الأول على آس

والشطر الاخر قام عجزه على اوس

صلوا على اللي بيّن الهدي للناس

محمد اللي صارت أحداثه دروس