جعل السحاب اللي قنوفه مراميس
يمطر على روحي ويسقي ضماها
ويبل ريـق اللي طوتـه الهواجيس
يابعــد رغبــات النفوس وهـواهــا
مبطي عن علوم المطر والعواسيس
والشـدة لـ دار بعيــد مـداهــا
والـبرد والرقــدة بخمسـة برانيس
يـاحــي طـاريهــا ولــذة دفــاهــا
يهديك يا حظـي ويلعنـك يا ابليس
هيضت روحـي لين جاهـا بلاهـا
ليت البشر مايجرحون الأحاسيس
أو ليت طيب الناس يغلب رداهـا
أضيق من شوف المدن والدواعيس
وأقول ياحـي السعة ما حـلاهـا
ودي أدوج بـ خايـع مابعــد ديس
قـد مـرّه سبـاع تدور عشـاهــا
البر بعيوني من الضيق تنفيس
للروح من هـم السنين وغثـاهـا
لاطرفت شمس العصر ياهل العيس
شــب الجـروم اللي يدلك سنـاهـا
مشتاق لأجواء الشتاء والنسانيس
والسيل لاغطّـى البقـاع وكسـاهـا
وأجمل عطر يسوى عطورات باريس
ريــح الحطــب بـ ثيـابنــا لامـلاها
ليست هناك تعليقات:
إرسال تعليق