قصة وقصيدة | كرم وشهامة مبارك البخيّت | روعة لا تطوفكم

قصة وقصيدة | كرم وشهامة مبارك البخيّت | روعة لا تطوفكم

..

هذه القصة حدثت لشخص يقال له : " مبارك البخيّت "

"البخيت" في سنة 1395هـ كان عسكري في الحرس الوطني ، وكان يسكن في منطقة بين مكة وجدة تُسمى "بحره" ، وبحره هذي كان فيها معسكرات للحرس الوطني يسمونها "الأفواج" ، وكان العاملين في الأفواج هذي يجون كل شهر يستلمون رواتبهم .

وأيضاً أصحاب الناقلات وأهل الأفواج يمرون عليه ، واللي يكدون ويروحون مشاوير يمرون على "البخيت" في بيته ويجلسون عنده بحكم أن مافيه أحد متأهل في المنطقة إلا هو ، وهو كان رجال كريم ولا يجيه أحد إلا يغديه أو يعشيه .

وفي يوم من الأيام كان عنده عشاء لربعه جايينه ، وجاه ضيوف عقب جهز عشاء ربعه ، وقال لهم الله يحييكم على عشاء ربعكم وحقكم باقي ، ويوم تعشوا ويحلف عليهم أن العشاء وإلا الغداء بكره لهم ، ولكن الضيوف تعذروا منه وقالوا عشانا حنا وربعنا يكفينا .

المهم أنه عقب مامشوا الضيوف قاموا عليه ربعه وقالوا يالبخيت : " أنت عبدٍ خبل ، أنت مانت إبن مهيد مصوت بالعشاء ، ولا أنت حاتم الطائي جالسن على درب أهل السيارات وعلى درب أهل الأفواج ، وكل ماجاك واحدن ذبحت له ذبيحه " .

لأنهم كانوا خايفين عليه أنه يحتاج لأنه كان عنده بيت وحريمه ثنتين ، وقالوا بكره يقاعدونك من الحرس وتجلس لا وظيفة ولا جمعت لك راس مال .

"البخيت" كان عنده مشب في الحوش يسوي فيه القهوه ، ويوم سمع هالكلام وهو يسوي القهوه ، دق البهار "الهيل" وبدال ما يحطه في الدله ، حطه في براد الشاهي .

قالوا له ربعه أنت خربت قهوتنا وش بلاك ، قال أنتم اللي خربتوها ، لكن شوفوا لكم واحدن صاحي يسوي لكم القهوه أنا هوجست .

وقال "البخيت" هذه القصيدة :

سجه مع الهاجـوس طبيعةٍ لـي

طبيعةٍ بـامـوت مـاجـزت عنـهـا

أشكي على الخلاق وأرفع له يدَي

لا كثرت الأفـكـار يـفـك منـهـا

أما الكرم قـد فـاز بـه حاتـم الطَـي

حتى الفرس من شان ضيفـه طعنهـا

خلوني أكرم فـي حياتـي وأنا حـي

لا مـت مـدري جثتـي مـن دفنـهـا

خلقـت فالدنيا وأنا مامعـي شــي

وبـروح منهـا مامعـي شـي منهـا

لابـد ما نرحـل عـن المـزح والغـي

ونسكـن بيـوتٍ قبلنـا مـن سكنهـا

مسكين ياللي تحسـب الواجـد شـوي

العافيـه لـو تنشـري وش ثمنـهـا

يا جاهل الدنيـا تراها كمـا الفـي

يا مخبل اللـي فـي حياتـه ضمنهـا

إن ناحرت لك قامـت تـروح وتجـي

مثـل الذلـول اللـي طويـلٍ رسنهـا

وإن دبـرت خلتـك طايـح ومـرمـي

وكـم واحـدٍ لـه حاجـةٍ ما ضمنـهـا

يالله عسى الحسنات تقضي على السي

لا قربـوا للنفـس ذرعــة كفنـهـا

..

وسلامتكم .. 📜